O PRACER DE LER, de Andrea Maceiras

Desde o equipo de Biblioteca e o EDLG do IES Marqués de Sargadelos queremos recomendar unha lectura moi especial: O pracer de ler, da escritora galega Andrea Maceiras.

Andrea Maceiras é unha das voces máis destacadas da literatura xuvenil galega actual. Nas súas obras aborda temas moi próximos á adolescencia, como a identidade, as emocións, as relacións persoais ou a importancia de atopar o propio lugar no mundo. En O pracer de ler, a autora reflexiona sobre o valor da lectura e sobre como os libros poden axudarnos a comprender mellor a realidade, acompañarnos nos momentos difíciles e abrirnos novas maneiras de pensar e sentir.

Trátase dunha lectura amena, sensible e moi próxima ao alumnado da ESO, ideal para descubrir que ler no é só unha actividade escolar, senón tamén unha fonte de emoción, aventura e crecemento persoal.

Un libro moi recomendable para seguir fomentando o gusto pola lectura en galego.

Traballo de Lingua Galega

Os soños cobran vida na biblioteca!

Esta semana a nosa biblioteca encheuse de creatividade,  grazas ao alumnado de 4º, que presentou os seus traballos arredor da obra Os soños na gaiola, unha das lecturas máis emblemáticas da literatura galega.

Dentro da materia de Lingua Galega, os rapaces e rapazas achegáronse ao universo poético de Manuel María. Os traballos presentados amosan non só a comprensión da obra, senón tamén a capacidade do alumnado para interpretar os poemas, expresar emocións e reflexionar sobre temas como a liberdade, a infancia, a natureza ou a identidade galega.

Desde a biblioteca queremos felicitar ao alumnado polo seu esforzo, así como agradecer ao departamento de Lingua Galega a súa implicación na promoción da lectura e da literatura galega entre os máis novos.

 

Charla educación afectivo-sexual FAPACEL

A educación afectivo-sexual foi a protagonista das charlas desenvolvidas o luns 18 de maio para o alumnado de 1º e 2º da ESO, nunha actividade organizada pola ANPA do IES Marqués de Sargadelos, e ofertada por FAPACEL.

As sesións foron impartidas pola matrona Sonia, quen abordou cuestións relacionadas coa afectividade, o respecto, a igualdade, a diversidade e as relacións saudables, promovendo a reflexión e o diálogo entre o alumnado. 

Este tipo de iniciativas contribúen ao desenvolvemento persoal e emocional da mocidade e favorecen unha convivencia baseada no respecto e na educación en valores.

A educación afectivo-sexual constitúe unha ferramenta fundamental para fomentar relacións responsables, libres de violencia e construídas desde a empatía e o bo trato.

LETRAS GALEGAS 2026

                                   

No IES Marqués de Sargadelos unímonos á celebración do Día das Letras Galegas lembrando a figura de Begoña Caamaño (1964-2014), escritora, xornalista e referente do feminismo galego contemporáneo.

A través da súa obra e do seu compromiso coa lingua e a cultura galega, Begoña Caamaño deixou unha fonda pegada na literatura do noso país, dando voz ás mulleres desde unha mirada crítica, libre e comprometida.

Nesta data tan especial queremos reivindicar a importancia de seguir coidando e transmitindo o galego, patrimonio vivo que nos identifica como pobo.

Ler, crear e vivir en galego é tamén unha forma de manter viva a nosa cultura.

NESTA LIGAZÓN PODES ATOPAR INFORMACIÓN SOBRE BEGOÑA CAAMAÑO

ESCAPE ROOM TRÁFICO

 O alumnado de 1º de bacharelato participou o xoves 14 de maio nunha actividade da DGT moi escpecial: o Escape Room "La hora de Oro".

A través do traballo en equipo, dos retos e da resolución de probas, o alumnado puido poñerse na pel dos servizos de emerxencia e reflexionar sobre a importancia da seguridade viaria e da actuación rápida ante un accidente de tráfico.

Unha experiencia dinámica, divertida e moi enriquecedora na que aprender tamén significa xogar e colaborar.

Grazas á DGT por achegar esta iniciativa educativa ao noso centro!

ACTO GRADUACIÓN 2º BACHARELATO

 Hoxe despedimos á promoción de 2º de Bacharelato 2025/2026 do IES Marqués de Sargadelos.

Unha tarde chea de emocións, recordos, risas, música e momentos mois especiais compartidos coas familias, profesorado e alumnado.

Remata unha etapa chea de aprendizaxes, esforzo, amizades, risas e recordos que quedarán para sempre na memoria deste centro.

Cada un de vós deixa a súa propia pegada nas aulas, nos corredores... e tamén nos nosos corazóns.

Agora comeza unha nova aventura.

Desexámosvos moita sorte nesta nova etapa e que nunca vos falte ilusión, valentía e ganas de cumprir os vosos soños.

E lembrade: esta sempre será a vosa casa!.

NOVIDADES

NOVIDADES

 A biblioteca do instituto segue medrando e, con ela, as oportunidades de viaxar a outros mundos, descubrir novas emocións e ampliar horizontes. Estas son algunhas das últimas incorporacións que xa podedes atopar nas nosas estanterías:

Para quen goza do misterio, En la oscuridad del bosque ofrece unha trama inquietante chea de segredos, onde nada é o que parece. 

A música tamén ten o seu espazo con  Los planetas e Esto es rock, un percorrido apaixonante pola historia deste xénero que marcou xeracións. Ideal para persoas curiosas e amantes da música.

En Nara e Memoria de sombra y bosque adentrámonos en mundos cheos de simbolismo, natureza e reflexión, onde o fantástico se mestura co emocional. Historias que convidan a ler amodo e a pensar.

A fantasía épica cobra vida en Alas de sangre, unha historia chea de acción, desafíos e personaxes que loitan polo seu destino nun mundo hostil.

Desde Galicia, Arnoia, Arnoia transpórtanos a unha aventura cargada de humor, crítica e elementos fantásticos, converténdose nunha lectura diferente e moi especial.

Por último, La biblioteca de los sueños imposibles é unha invitación a crer no poder dos libros e na maxia das historias que poden cambiar vidas.

---

Pásate pola biblioteca, explora estas novidades e déixate sorprender. Porque sempre hai un libro agardando por ti.