10 de decembro · Día Internacional dos Dereitos Humanos

O 10 de decembro conmemórase o Día Internacional dos Dereitos Humanos, unha data que lembra a aprobación da Declaración Universal dos Dereitos Humanos en 1948. Este documento fundamental recoñece dereitos e liberdades básicos para todas as persoas, como a igualdade, a liberdade, a dignidade e a xustiza, sen distinción ningunha.

Desde a biblioteca queremos contribuír á reflexión e ao compromiso con estes valores universais. Por iso, poñemos á disposición da comunidade educativa unha selección de libros, lecturas e vídeos que abordan os dereitos humanos desde diferentes perspectivas: a historia, a memoria, a igualdade, a diversidade e a defensa das liberdades fundamentais.

Ler, ver e pensar tamén é unha forma de defender os dereitos humanos.

 

 

 

 

Charla WIFI, CHOCOLATE E BURATOS NEGROS

 O Departamento de Tecnoloxía organizou hoxe a charla "Wifi, chocolate e buratos negros", impartida por Felipe Gómez Cuba, enxeñeiro de Telecomunicacións, orientada para o alumnado de 4º da ESO e 1º de bacharelato.

Explicounos que os buratos negros son zonas onde a gravidade é tan extrema que nin a luz pode escapar, e por iso é tan difícil fotografalos: só podemos captar a luz deformada da materia que xira ao seu redor, usando telescopios sincronizados por todo o mundo.

Faloumos tamén da transmisión da enerxía e da información a través das ondas electromagnéticas, a base do wifi, da radio e mesmo da luz.

E rematamos cun experimento curioso: usar unha lata de chocolate en po para fabricar unha pequena antena direccional que concentra o sinal wifi nunha dirección, demostrando de forma práctica como funcionan as antenas.

Unha charla que espertou curiosidade e mostrou que a física está máis perto do que parece!

Charla PAU e USC

Hoxe o noso alumnado de 2º de bacharelato participou nunha sesión informativa impartida por Francisco Rodríguez Lestegás, profesor emérito da USC, na que puideron resolver dúbidas sobre as probas PAU: matrícula, elección de optativas, ponderacións e todas as novidades que trae para este curso. 

A sesión tamén lles permitiu coñecer mellor o funcionamento da universidade: que son os graos, como se organiza o estudio por créditos  ECTS, os diferentes tipos de aulas e metodoloxías docentes, así como a información práctica sobre residencias universitarias e vida académica

Un paso máis para afrontar con seguridade esta etapa decisiva.

Grazas pola visita e pola claridade das explicacións!

Día das persoas con discapacidade

 

 

 

O 3 de decembro celebramos o Día Internacional das Persoas con Discapacidade, unha data promovida pola ONU para lembrar a importancia de construír unha sociedade máis inclusiva, accesible e respectuosa coa diversidade humana.

Nas bibliotecas escolares este día convértese nunha oportunidade para reflexionar sobre como os libros, as historias e a cultura axudan a derrubar prexuízos, poñendo voz a persoas que, moitas veces, ficaron fóra do foco da creación literaria.

A lectura permítenos achegarnos ás distintas realidades da discapacidade —física, sensorial, intelectual ou invisible— desde a empatía e o coñecemento. Por iso, quixemos reunir unha selección de obras que amosan personaxes diversos, experiencias reais, biografías inspiradoras e relatos que reivindican os dereitos das persoas con discapacidade.

Convidámosvos a mergullarvos nestas lecturas, a recoñecer o valor da diversidade e a descubrir que todas as persoas, con independencia das súas capacidades, forman parte imprescindible da nosa comunidade.

Charla TI ELIXES

 O mércores 3 de decembro, o alumnado de 3º ESO tivo unha charla sobre orientación vocacional.

O programa"Que non te líen, ti elixes" é unha iniciativa conxunta da Consellería de Educación, Ciencia, Universidades e Formación Profesional e da Consellería de Emprego, Comercio e Emigración a través da cal se busca fomentar, desde as aulas, unha orientación profesional libre de estereotipos de xénero así como a igualdade de oportunidades entre homes e mulleres e o fomento da coeducación.

A finalidade deste programa é seguir avanzando na presenza de mulleres en sectores tradicionalmente masculinizados como o forestal, a construción, o marítimo-pesqueiro, o do metal ou as TIC. Como novidade nesta edición, introducíronse nesta iniciativa contidos relacionados coa presenza de homes en profesións consideradas tradicionalmente feminizadas, co obxectivo de romper cos prexuízos ou estereotipos de xénero nas diferentes profesións.

Grazas a  Iris e Arantxa, dúas mulleres traballadoras do sector do mar, por dar exemplo e facer pensar á xuventude dos estereotipos de xénero nas profesións.

Novidades

 Esta semana, o espazo de exposicións da biblioteca renóvase cun conxunto de contidos que unen actualidade, literatura e reflexión crítica sobre os medios.

Por unha banda, presentamos os novos carteis dedicados as estreas cinematográfics e literarias do momento, unha selección visual que permite ao alumnado coñecer as tendencias actuais tanto na sala de cine como nas librarías. Acompáñanse tamén recortes de prensa con entrevistas culturais recentes, que ofrecen unha mirada directa a voces destacadas do panorama artístico e literario.

Ademais, incluímos un artigo informativo sobre Roblox, centrado na problemática da verificación de identidade e nos riscos que isto supón para a seguridade dos menores en contornas dixitais. Un recurso pensado para promover o espírito crítico e o uso responsable das plataformas en liña.

Aproveitamos tamén o lanzamento da nova versión cinematográfica de Frankenstein dirixida por Guillermo del Toro para convidar a redescubrir o clásico de Mary Shelley. No panel correspondente pódese consultar información sobre a autora, o contexto da obra e a súa enorme influencia na literatura fantástica e de ciencia ficción.

Novidades da semana

 

13 de novembro

Esta semana o espazo de novidades da biblioteca resalta por unha banda uns carteis explicativos dedicados ao centenario do nacemento de Ana María Matute, unha das grandes voces da narrativa española do século XX. No panel pódese consultar unha breve contextualización da súa vida e obra, así como unha selección representativa dos seus libros dispoñibles na biblioteca, para que quen o desexe poida achegarse ao seu universo literario.  

Xunto a ela, tamén se inclúen materiais sobre Eduardo Mendoza, recentemente recoñecido co Premio Princesa de Asturias das Letras. Amosamos unha pequena mostra das súas obras máis destacadas, acompañadas dun resumo introdutorio que permite comprender mellor a relevancia deste autor na literatura contemporánea.

Finalmente, o noso cartel incorpora tamén unha referencia cultural de actualidade: o estreo da película Bugonia. Para facilitar o achegamento ao novo filme, engadimos unha sinopse clara e unha breve crítica que axuda a valorar os seus principais acertos, temas e proposta narrativa.

Con esta combinación de literatura, análise e cultura audiovisual, a biblioteca quere ofrecer cada semana un espazo dinámico que esperte a curiosidade e anime a descubrir novas lecturas e creacións artísticas. 

25N

 📚💜 25N na biblioteca do centro 💜📚

Este ano conmemoramos o Día Internacional da Eliminación da Violencia contra as Mulleres cun espazo moi especial: o noso punto violeta, onde presentamos unha selección de libros para pensar, sentir e tomar conciencia.
✨ “Que o único que che roube o alento sexa un libro” é o lema que guía esta iniciativa.

Ao longo da biblioteca tamén agardan citas repartidas polas mesas e estanterías, pequenas pinceladas de reflexión para acompañar as lecturas, xunto cunha exposición de carteis elaborados polo alumnado, que enchen o espazo de creatividade, sensibilidade e compromiso.

A lectura é unha das mellores ferramentas para construír igualdade. Sigamos lendo, aprendendo e avanzando xuntas e xuntos. 💜📖

Charla educación afectivo-sexual

  Hoxe estivo no noso centro María González Cociña, matrona e directora do Centro M (Burela), para impartir dous talleres de educación sexual adaptados á etapa da adolescencia. 

Comezou co alumnado de 1º e 2º ESO, con "Coñecendo o meu corpo". Este taller aborda os cambios físicos e emocionais que experimentan os rapaces e rapazas na pubertade, enfocado para promover a igualdade, a empatía e o respecto cara os compañeiros e compañeiros. Mediante presentación e actividades interactivas explicouse a función reproductiva de ambos e profundizamos no ciclo menstrual. Tamén se achegaron productos de hixiene menstrual para familiarizarse con eles. 

Despois, impartiu o taller "Sexualidade responsable" co alumnado de 2º e 4º da ESO. Nel deu información clara e adaptada sobre relacións sexuais, ITS e anticoncepción, fomentando o autocoñecemento, a relación positiva ca propia sexualidade, a toma de decisións responsables e o respecto interpersoal.

Estes talleres foron moi enriquecedores e contribúen á educación integral do noso alumnado.

Charla INICIACIÓN SEGURA Á PEGADA DIXITAL

 Hoxe visitounos David, da Axencia para a Modernización Tecnolóxica de Galicia (AMTEGA) para realizar co alumnado de 3° da ESO un taller co obxectivo  de sensibilizar sobre o uso responsable de Internet e redes sociais, así como da importancia de manter unha pegada dixital segura e positiva.

O contido deste taller centrouse en:

- Comprender que é a pegada dixital e como se forma.

- Identificar risco asociados á sobreexposición de datos persoais.

- Aprender a configurar a seguridade e privacidade nas redes sociais como WhatsApp, Instagram, TikTok, BeReal,..

- Fomentar prácticas seguras e responsables do uso das TIC.

Agardamos que esta charla nos axude a navegar en rede con máis criterio, seguridade e responsabilidade.

Charlas Fundación Alar Galicia

 A fundación Alar Galicia traballa na comunidade galega desde 2001 cos colectivos e persoas máis desfavorecidas. Actualmente faino en todo o territorio galego cos colectivos prioritarios de mulleres e menores, desde diferentes ámbitos, como a prevención e sensibilización de conductas autolíticas e suicidas, a prevención da violencia de xénero e da filioparental, entre oturos programas. 

Hoxe, martes 10 de novembro, visitaron o noso centro Lorena e Tania para dar dúas charlas ao noso alumnado. Na primeira, co alumnado de 3º da ESO, traballaron a "Influencia das novas tecnoloxías na conduta suicida". Na segunda, falaron da "Violencia machista e saúde mental na xuventude" co alumnado de 4º ESO.

Presentación do Concurso de postais de Nadal

Presentamos o cartel do Concurso de postais de Nadal. Animamos a participar todo o alumnado do centro, que poderán entregar as súas propostas antes do venres 12 de decembro.

 

 Aproveitamos o día mundial da ciencia para a paz e o desenvolvemento para facer unha  mostra de posibles lecturas ao alumnado. Repartíronse diferentes citas por toda a biblioteca coas que os alumnos de 3º ESO realizarán unha serie de tarefas na hora de titoría.

                                             

                                                                                                                    

 

Hoxe botou a andar o Club de lectura "Palabras de Porcelana", coa primeira reunión na biblioteca. O alumnado interesado acudiu no primeiro recreo. Agardamos con interese as próximas reunións.

SAMAÍN NA BIBLIOTECA. O medo tamén se le

 Para celebrar o Samaín, decoramos a nosa biblioteca e iluminámola con candeas e cabazas artísticas e orixinais feitas polo alumnado.

Nos dous recreos do  xoves 30 de outubro, alumnado de diferentes cursos fixeron lecturas de relatos terroríficos á luz das candeas, dentro da actividade "O medo tamén se le".

Charlas PLAN DIRECTOR GARDA CIVIL

 

Hoxe visitounos Héctor Méndez, formador da Garda Civil para impartir tres charlas do Plan Director.

As primeiras foron dirixidas a 2º e 3º da ESO, e FP Básica, sobre a prevención dos delitos de odio, que son actos que implican discriminación, hostilidade ou violencia contra un grupo baseado en características como raza, relixión, orixe, orientación sexual ou discapacidade.

A continuación, co alumnado de 1º da ESO tratou as consecuencias que padecen as persoas que sofren o acoso escolar, xa sexa o acoso tradicional ou que se que produce facendo uso de medios tecnolóxicos. Puxo especial atención en que é responsabilidade de todos e todas denuncialo e combatelo.

Por último, impartirónse dúas charlas sobre prevención de delitos sexuais nos que puideran estar implicados nenos, nenas e adolescentes, como vítimas e como autores, para alumnado de 2º e 3º da ESO e 1º FP Básica.

Información variada

16 de outubro

Mostraremos de forma habitual as diferentes estreas de cine e os libros máis vendidos no taboleiro de novas.

Premio Planeta 2025

 15 de otubro.

Recollemos no taboleiro de Novas artigos relativos o Premio Planeta 2025, para Juan del Val coa novela Vera, una historia de amor.

A escritora galega Ángela Banzas quedou finalista coa novela Cuando el viento hable.

13 de outubro: Día das escritoras

 "As escritoras activas ao redor de 1975 reflicten en moitas das súas obras o desexo dun cambio profundo e radical nas vidas das mulleres, denuncian a falta de liberdade e de autonomía, dan testemuño do que ocorre fóra de España, esixen unha nova orde amorosa e un cambio nas leis que as veu marxinando durante o franquismo".

Anna Caballé, comisaria de la X edición del Día de las Escritoras

Mostramos na biblioteca o cartel do día das escritoras e unha selección de textos destas dez autoras, mulleres que nos anos 70 publicaron en galego.

Premio Nobel de literatura 2025: László Krasznahorkai

9 outubro

Recollemos no taboleiro de Novas varios artigos sobre o novo premio Nobel de literatura.

Krasznahorkai é un autor coñecido por unha prosa densa, de longas frases, tons que combinan o melancólico, o existencial e o absurdo. A súa escritura móvese por escenarios de desolación e procura de sentido, a miúdo ao bordo do colapso social ou individual.