23 de febreiro, día de Rosalía

Cada 23 de febreiro celebramos o Día de Rosalía, unha data moi especial para a cultura galega, pois conmemora o nacemento de Rosalía de Castro (1837–1885), unha das figuras máis importantes da nosa literatura.

Rosalía foi pioneira na defensa da lingua galega nun momento no que estaba relegada ao ámbito oral. Coa publicación de Cantares Gallegos en 1863, marcou o inicio do Rexurdimento, devolvéndolle ao galego o seu prestixio como lingua literaria. Outras obras destacadas como Follas Novas e En las orillas del Sar amosan unha voz íntima, comprometida e profundamente humana.

Na biblioteca queremos renderlle homenaxe cunha pequena exposición de libros, poemas e materiais sobre a súa vida e obra. Animámosvos a achegarvos, descubrir ou redescubrir os seus versos e celebrar a forza dunha autora que segue a emocionarnos hoxe.

Porque Rosalía non é só pasado: é identidade, é lingua e é memoria viva.

 

11 de febreiro, Día Internacional da Muller e a Nena na Ciencia

 

O 11 de febreiro, celebramos o Día Internacional da Muller e da Nena na Ciencia, unha data promovida pola Organización das Nacións Unidas para visibilizar o papel das mulleres na investigación científica e tecnolóxica.

Desde a biblioteca do IES sumámonos á conmemoración cunha pequena selección de libros e materiais sobre mulleres científicas e referentes femininos en diferentes ámbitos da ciencia. Esta iniciativa busca espertar vocacións, romper estereotipos e lembrar que a ciencia tamén se constrúe en feminino. 

Animámosvos a achegarvos á biblioteca, descubrir as lecturas propostas e inspirarvos nas historias de tantas mulleres que abriron camiño.

 DÍA DA ILUSTRACIÓN, 30 DE XANEIRO DE 2026

O 30 de xaneiro celébrase o Día da Ilustración, unha data para recoñecer a importancia da imaxe nos libros e o traballo dos ilustradores e ilustradoras. A ilustración complementa o texto, axuda a contar historias e esperta a creatividade dos lectores.

Desde a biblioteca do instituto sumámonos a esta celebración cunha mostra de libros ilustrados, con diferentes estilos e temáticas, para poñer en valor esta forma de expresión artística e fomentar o gusto pola lectura.

Convidámosvos a visitar a biblioteca e descubrir esta selección especial.

MOCHILAS VIAXEIRAS

A lectura bota a andar!

No IES Marqués de Sargadelos entregamos as Mochilas Viaxeiras ao alumnado de 1º da ESO, unha actividade impulsada polo Equipo de Biblioteca.

Cada mochila vai cargada de libros para gozar en familia, descubrir novas historias e levar a lectura fóra do centro. Agora circularán de fogar en fogar, enchendo o camiño de imaxinación, aprendizaxe e ilusión.

Desexámosvos unha viaxe chea de boas lecturas!

Presentación IV Torneo de Xadrez

Desde o equipo da Biblioteca do IES Marqués de Sargadelos temos o pracer de presentar o IV Torneo de Xadrez do noso centro. Unha oportunidade perfecta para poñer a proba a túa estratexia, concentración e paixón polo xadrez.

As inscricións están abertas na biblioteca ata o venres 20 de febreiro.

Se che gusta o xadrez, non o penses máis e anímate a participar!

 

NATURGY. Obradoiro "A enerxía en xogo"

Hoxe o alumnado de 1º e 2º ESO participou en "A enerxía en xogo", un taller interactivo da Fundación Naturgy, organizado polo Departamento de Tecnoloxía. Durante dúas sesións intensas na biblioteca, aprenderon xogando sobre eficiencia enerxética, sustentabilidade e toma de decisións responsables.

Foi unha experiencia divertida e educativa, na que o alumnado traballou en equipo, investigou e reflexionou sobre o futuro enerxético do noso planeta.

E PARA DIXITALIZARSE, LUGO. Uso seguro e responsable de internet

 O alumnado de 1º e 2º da ESO do IES Marqués de Sargadelos segue formándose no mundo dixital.

Participamos no programa "E para dixitalizarse, Lugo", impulsado pola Deputación de Lugo e financiado con fondos europeos. 

Ao longo de varias sesións, o noso alumnado aprenderá sobre o uso seguro, responsable e consciente de internet, unha competencia clara no día a día actual.

As actividades comezaon o xoves 15 de xaneiro, e continuarán os días 29 de xaneiro  e 5 de febreiro.

Seguimos apostando pola educación dixital de calidade!

Charla FORZAS ARMADAS

O alumnado de 4º ESO e 1º de bacharelato asistiu hoxe a unha charla informativa sobre a estructura das Forzas Armadas e as vías de acceso á carreira militar. Durante a sesión abordáronse cuestións como as escalas e especialidades, os requisitos de acceso, a duración dos estudos, a equiparación das titulacións, así como os destinos profesionais e as condicións laborais e salariais.

Unha actividade de orientación académica e profesional para axudar ao alumnado a coñecer novas opcións de futuro.

PREMIOS Concurso de postais de Nadal

Xa temos gañadoras do Concurso de Postais de Nadal!

Desde o IES Marqués de Sargadelos queremos felicitar a todo o alumnado participante pola súa creatividade, orixinalidade e implicación.

O concurso, que contou cunha moi alta participación, foi organizado polo equipo de Biblioteca, o departamento de Artes Plásticas e o equipo de Dinamización da Lingua Galega, e puxo en valor o talento artístico e o emprego do galego no noso centro.

1º premio: Iria Baltar Canoura.

2º premio: Irea Río Labaén.

3º premio: Claudia López Rivas

Parabéns ás premiadas e grazas a todas e todos os participantes por encher o Nadal de creatividade, arte e lingua.